Prezident İlham Əliyevin həyata keçirdiyi qətiyyətli siyasi kurs, hərbi-strateji planlaşdırma və beynəlxalq platformalarda nümayiş etdirdiyi prinsipial mövqe nəticəsində Azərbaycan uzun illər davam edən ədalətsizliyə son qoydu. Kəlbəcərin azad olunması müasir dövlətçilik düşüncəmizin, milli həmrəyliyimizin və güclü siyasi iradənin bariz ifadəsinə çevrildi. Regionun bərpası və tam şəkildə yenidən qurulması hazırda dövlət siyasətinin prioritet istiqamətlərindən biridir. Kəlbəcər təbii ehtiyatları, su resursları və strateji coğrafi mövqeyi ilə ölkəmizin iqtisadi inkişafı üçün geniş imkanlar yaradır. Prezident İlham Əliyevin təşəbbüsü ilə həyata keçirilən “Böyük Qayıdış” proqramının əsas hədəflərindən biri bölgənin müasir standartlara uyğun bərpası, təhlükəsiz həyat şəraitinin təmin edilməsi və geniş infrastruktur quruculuğunun reallaşdırılmasıdır. Bu məqsədlə yollar inşa edilir, enerji təminatı sistemləri qurulur, müasir yaşayış məhəllələri salınır və xidmət sahələri formalaşdırılır. Kəlbəcərin hərtərəfli inkişafı dövlətimizin uzunmüddətli planlarında xüsusi yer tutur və regionun gələcək inkişaf potensialı artıq real konturlar almışdır. Kəlbəcərin geri qaytarılması həm də Azərbaycanın regional təhlükəsizlik sistemində fəal rolunu daha da gücləndirib. Ölkəmiz bölgədə dayanıqlı sülhün əsas tərəfdarı kimi çıxış edir və sülh gündəliyinin irəliləməsi üçün ardıcıl səylər göstərir. Dövlət başçısının irəli sürdüyü təşəbbüslər regionda yeni əməkdaşlıq mühitinin formalaşmasına şərait yaradıb, nəqliyyat-kommunikasiya xətlərinin bərpası və iqtisadi əlaqələrin genişlənməsi üçün real imkanlar açıb. Azərbaycanın suverenlik prinsiplərinə əsaslanan bu siyasət beynəlxalq aləmdə də yüksək qiymətləndirilir. Hazırda Kəlbəcərdə aparılan hərtərəfli yenidənqurma işləri Azərbaycanın iqtisadi gücünü, siyasi iradəsini və təşkilati bacarığını nümayiş etdirir. Dövlət proqramları çərçivəsində həyata keçirilən layihələr bölgənin sosial və iqtisadi həyatını canlandırır, əhalinin təhlükəsiz və rahat şəkildə öz yurdlarına qayıtmasına şərait yaradır. Kəlbəcər üçün müəyyən olunan inkişaf modeli innovativ yanaşmalar, ekoloji dayanıqlılıq və mənbələrin səmərəli istifadəsi prinsipinə əsaslanır. Bu yanaşma regionun gələcək fəaliyyət istiqamətlərini müəyyənləşdirir və müasir şəhərsalma konsepsiyasına uyğun kompleks inkişaf strategiyasını təmin edir. Kəlbəcərin azad olunması həm də Azərbaycan xalqının birliyini, qətiyyətini və öz dövlətinə güvənini yenidən təsdiqlədi. Bu zəfər illərlə aparılan ardıcıl dövlət siyasətinin, güclü diplomatiyanın və peşəkar Silahlı Qüvvələrin əldə etdiyi strateji nailiyyətdir. Prezident İlham Əliyevin rəhbərliyi ilə həyata keçirilən sistemli islahatlar ordu quruculuğunda, dövlət idarəçiliyində və diplomatik fəaliyyətdə yüksək nəticələr verdi. Məhz bu istiqamətlər üzrə əldə edilən uğurlar Kəlbəcərin azad olunmasını mümkün etdi və Azərbaycanın regionda aparıcı mövqeyini daha da möhkəmləndirdi. Bu gün ölkəmiz Kəlbəcərin bərpasına sadəcə bir yenidənqurma layihəsi kimi deyil, həm də milli irsə qaydış, tarixi ədalətin təmin olunması və xalqın öz torpaqlarına sahib çıxması kimi yanaşır. Qayıdış prosesi təkcə infrastrukturun qurulması ilə məhdudlaşmır; burada sosial-iqtisadi inkişaf, mədəni irsin qorunması, ekoloji balansın bərpası və uzunmüddətli təhlükəsizlik təminatı da əsas hədəflər sırasındadır. Dövlət proqramları regionun hər bir istiqamətdə inkişafını təmin edən kompleks tədbirlər sisteminə əsaslanır. Kəlbəcərin gələcək inkişafı Azərbaycan dövlətinin gücünün, imkanlarının və strateji baxışının real təzahürüdür. Bu bölgənin iqtisadi səmərəliliyi, təbii ehtiyatları və coğrafi üstünlükləri ölkəmizin regional və qlobal proseslərdə mövqeyini daha da gücləndirəcək. Əminliklə demək olar ki, həyata keçirilən siyasət nəticəsində Kəlbəcər yaxın illərdə Cənubi Qafqazın ən dinamik inkişaf edən bölgələrindən birinə çevriləcək və özünün zəngin potensialını tam şəkildə reallaşdıracaq.

Fərid Mustafayev

YAP Yasamal rayon Elm və Təhsil Nazirliyinin Torpaqşünaslıq və Aqrokimya İnstitutu üzrə ərazi partiya təşkilatının sədr müavini