Avqustun 30-da Bakıda Azərbaycan Avtomobil Federasiyası (AAF) və Azərbaycan Respublikası Atçılıq Federasiyasının (ARAF) birgə təşkilatçılığı ilə klassik avtomobillərin və çövkən oyunu, at şousunun bir araya gəldiyi tədbir keçirilib.

Oxu.Az xəbər verir ki, tədbir zamanı Binə Atçılıq Mərkəzində klassik avtomobillərin nümayiş edildiyi sərgi təşkil olunub.

Daha sonra başlayan tədbirdə Azərbaycan Avtomobil Federasiyası və Azərbaycan Respublikası Atçılıq Federasiyasının fəaliyyətinə dair videoçarx nümayiş etdirilib.

Tamaşaçılara Qarabağ atlarının füsunkar çıxışı - "Zəfər" proqramı təqdim edilib.

Azərbaycanda milli atüstü oyun növlərindən biri olan - çövkən oyunu barədə videoçarx təqdim olunub.

Tədbir Azərbaycan-İtaliya yoldaşlıq çövkən oyunu ilə davam edib. Oyun idmanın dostluq və əməkdaşlıq missiyasını əks etdirib.

Qeyd edək ki, 2013-cü ildə UNESCO-nun Təcili Qorunmağa Ehtiyacı Olan Qeyri-Maddi Mədəni İrs Siyahısına daxil edilən milli atüstü oyun növü-çövkən təkcə idman növü deyil, həm də zəngin mədəni irsdir.

Onu da vurğulayaq ki, gələn il Bakıda 2-ci Çövkən üzrə Dünya Çempionatı baş tutacaq.

Tədbirin sonuna doğru "Ən yaxşı qadın süvari", "Ən yaxşı kişi süvari" və "Ən nizamlı sürücü", "Ən unikal avtomobil", "Ən orijinal avtomobil", "Ən əfsanəvi avtomobil", "Ən qədim avtomobil", "1950-1960-cı illərin ən fərqli avtomobili" , "1970-1980-ci illərin ən fərqli avtomobili"nin sürücüləri təltif ediliblər.

Burada yalnız idmançı və sürücülər deyil, həm də rəngarəng retro geyimi ilə seçilən qonaqlar mükafatlandırılıblar. "Ən rəngarəng retro geyimli" üç qalib təltif edilib.

Gecə konsert proqramı ilə davam edib. Səhnəyə məşhur tenorlar Vittorio Grigolo (İtaliya) və Yusif Eyvazov (Azərbaycan), eləcə də soprano ifaçısı Afaq Abbasova (Azərbaycan) çıxaraq opera ifaları ilə gecəyə sənət ruhu qatıblar. Daha sonra müasir musiqi səhnəsinin sevilən siması Minelli (Rumıniya) öz enerjili çıxışı ilə tamaşaçılara unudulmaz anlar yaşadıb.

Tədbir "Nazar Holdings", "Volvo Cars", "Azerbaijan Automobiles", "Azpetrol" şirkətlərinin sponsorluğu, "Motor House", "Green Car" mərkəzlərinin, Regional İnkişaf İctimai Birliyi (RİİB) və "Nargis" jurnalının təşkilati dəstəyi ilə keçirilib.

Xatırladaq ki, Beynəlxalq Avtomobil Federasiyasının tamhüquqlu üzvü olan AAF avtomobil idmanının inkişafı, yol hərəkəti təhlükəsizliyi və avtomobil irsinin təbliği istiqamətində müxtəlif layihə və tədbirlər həyata keçirir.

Bu fəaliyyətlər sırasında avtoidman yarışları, sürət festivalları, drift və yolsuzluq yürüşləri, klassik avtomobil sərgiləri xüsusi yer tutur. Federasiyanın təşəbbüsləri beynəlxalq səviyyədə də yüksək qiymətləndirilib. 2024-cü ildə Kiqalidə keçirilən FIA mükafatlandırma mərasimində AAF "Klassik avtomobillər" sərgisinə görə "İrsin Təbliği Kubokuna" layiq görülüb.

ARAF isə bu illər ərzində həmçinin Qarabağ atlarının qorunması, beynəlxalq tədbirlərdə tanıdılması istiqamətində mühüm işlər görüb. Bu ilin may ayında Qarabağ atları artıq 9-cu dəfə İngiltərədə Vindsor Kral Atçılıq Şousunda, İstanbulda keçirilən Etnosport Mədəniyyət Festivalında möhtəşəm çıxış edib və tamaşaçıların böyük rəğbətini qazanıb. Eyni zamanda, çövkən oyunu artıq dünya miqyasında tanıdılaraq beynəlxalq yarışlara çıxarılıb.

Aygün Mirakif