"Çin-Azərbaycan münasibətləri hərtərəfli strateji tərəfdaşlığa əsaslanır və bir çox sahələrdə dinamik inkişaf edir".

KANAL 20 TV APA-ya istinadən xəbər verir ki, bunu jurnalistlərə açıqlamasında Azərbaycan Respublikası Prezidentinin köməkçisi - Prezident Administrasiyasının xarici siyasət məsələləri şöbəsinin müdiri Hikmət Hacıyev bildirib.

Hikmət Hacıyev qeyd edib ki, Azərbaycan və Çinin çox möhkəm siyasi əlaqələri mövcuddur:

"Əlaqələrimizin inkişafında Azərbaycan Prezidenti İlham Əliyevin bu il Çinə dövlət səfəri mühüm rol oynadı. Bu gün həmçinin Çin Xalq Respublikasının sədri Si Cinpin ilə Azərbaycan Prezidenti İlham Əliyev arasında daha bir səmərəli görüş oldu. Onlar bir-birlərini "Mənim əziz dostlarım" adlandırırlar. Bu ruh bir daha Çin və Azərbaycan arasındakı dostluq əlaqələrinin təcəssümüdür. Azərbaycan həmişə tək Çin siyasətini dəstəkləyib. Biz Çinin Tayvan, Honq-Konq və Sincan bölgəsi ilə bağlı siyasətini dəstəkləyirik".

Azərbaycan və Çinin terrorizm, ekstremizm və separatizmlə mübarizədə səylərinə də toxunan H.Hacıyev bildirib ki, hər iki ölkə daxili işlərə qarışmama və iqtisadi inkişaf modeli üçün suveren seçim prinsiplərini rəhbər tutur:

"Bu siyasi ruh həm də ölkələrimiz arasında iqtisadi-ticari əlaqələrə və texnoloji əməkdaşlığa çevrilir. Bu gün Azərbaycan Prezidenti Çinin enerji, bərpaolunan enerji texnologiyaları, rabitə və digər sahələr üzrə aparıcı şirkətləri ilə görüşlər keçirəcək. Ümid edirik ki, bu səfər Çin-Azərbaycan iqtisadi-ticarət əlaqələrinin gələcək inkişafına səmərəli töhfə verəcək".