Fransa prezidenti Emmanuel Makron ölkənin borc vəziyyəti və 2026-cı il büdcəsi ilə bağlı yaranan gərginlik fonunda istefa vermək niyyətində olmadığını bir daha təsdiqləyib. O, Tulon şəhərində Almaniya Kansleri Fridrix Merz ilə birgə mətbuat konfransında prezidentlik mandatını sona qədər davam etdirəcəyini bildirib.

AZƏRTAC xəbər verir ki, Makron siyasi partiyaları ölkənin maliyyə problemləri qarşısında məsuliyyətli davranmağa və razılıq yolları tapmağa çağırıb. Onun sözlərinə görə, hazırkı vəziyyət qətiyyən çıxılmaz deyil və mövcud vəziyyətlə bağlı heç olmasa ortaq bir anlaşma olmalıdır.

“Fransua Bayru siyasi qüvvələri ölkənin borc yükü qarşısında məsuliyyətə çağırmaqda haqlıdır. Müxtəlif həll yolları ilə bağlı fikir ayrılıqları ola bilər, amma vəziyyətin ağırlığına dair ortaq fikir formalaşmalıdır”, – deyə Makron vurğulayıb.