ABŞ “NATO 3.0” konsepsiyası çərçivəsində Avropa istiqaməti və Ukrayna ilə bağlı məsuliyyətin böyük hissəsini “köhnə qitə” ölkələrinin üzərinə qoyacaq.

AZƏRTAC xəbər verir ki, NATO-nun Baş katibi Mark Rütte bu barədə Anadolu agentliyinə müsahibəsində deyib.

Baş katib qeyd edib ki, ABŞ Avropadakı hərbi mövcudluğunu və nüvə çəkindirmə imkanlarını qoruyacaq, Aİ ölkələri isə alyans daxilində daha böyük məsuliyyət daşıyacaqlar. Onun sözlərinə görə, yaxın vaxtlarda NATO-nun birgə komandanlığından üçünə avropalılar rəhbərlik edəcək.

Mark Rütte, həmçinin Avropa ölkələrinin Ukraynaya maliyyə dəstəyinin göstərilməsində də aparıcı rol oynayacağını, ABŞ-nin isə mühüm hərbi texnika tədarükünü davam etdirəcəyini bildirib. O əlavə edib ki, maliyyələşdirmə əsasən Avropa ölkələri və Kanada tərəfindən təmin olunacaq.

Baş katibin fikrincə, bu model NATO daxilində məsuliyyət bölgüsünü daha ədalətli edəcək, alyansın çəkindirmə potensialını gücləndirəcək və dayanıqlılığını artıracaq.