Rusiya Prezidenti Vladimir Putin və ABŞ Prezidenti Donald Tramp arasında təxminən 40 dəqiqə davam edən telefon danışığı baş tutub. 

Putin və Tramp birbaşa Rusiya-Ukrayna danışıqlarının səviyyəsinin yüksəldilməsi ideyasını müzakirə ediblər.

Kremlin köməkçisi Yuriy Uşakov bildirib ki, bu danışıq ABŞ tərəfinin təşəbbüsü ilə həyata keçirilib və açıq, konstruktiv xarakter daşıyıb.

Danışıqlar zamanı Tramp Putinə Ukrayna Prezidenti Volodimir Zelenski və Avropa liderləri ilə aparılan görüşlər barədə məlumat verib. O cümlədən tərəflər Ukrayna və digər regional məsələlər üzrə gələcək əməkdaşlıq imkanlarını müzakirə ediblər.

Hər iki prezident Rusiya və Ukrayna nümayəndə heyətləri arasında birbaşa danışıqların vacibliyini vurğulayıb və bu prosesin davam etdirilməsində maraqlı olduqlarını ifadə ediblər. Bundan əlavə, liderlər Moskva və Kiyevin nümayəndələrinin danışıqlardakı səviyyəsinin yüksəldilməsi imkanını da gündəmə gətiriblər ki, bu da sülh danışıqlarının daha effektiv və nəticəyönlü olmasını təmin edə bilər.

Telefon danışığı zamanı Putin ABŞ prezidentinə Alyaskada keçirilən sammit zamanı Ukrayna üzrə sülh prosesində əldə olunan irəliləyişlərə görə təşəkkürünü bildirib. Uşakov əlavə edib ki, telefon danışığı tərəflər arasında münasibətlərin möhkəmləndirilməsi və qarşılıqlı anlaşmanın artırılması baxımından mühüm əhəmiyyət daşıyıb. 

Donald Tramp Vladimir Putin və Vladimir Zelenski arasında görüş üçün hazırlıqların başladığını bildirib.

Bu görüşdən sonra ABŞ prezidentinin də daxil olduğu üçtərəfli görüş baş tutacaq.

Bu danışıqlar həm Rusiya-Ukrayna münaqişəsinin həlli, həm də beynəlxalq əməkdaşlığın gücləndirilməsi baxımından vacib addım kimi qiymətləndirilir.//Musavat.com//