Azərbaycan və Gürcüstan hökumətləri arasında ticarət, enerji, nəqliyyat, tranzit və digər sahələrdə əməkdaşlığın möhkəmləndirilməsi müzakirə olunub.

Kanal 20 TV xəbər verir ki, bu barədə iqtisadiyyat naziri Mikayıl Cabbarov özünün "X" sosial şəbəkəsindəki hesabında məlumat verib.

Nazir bildirib ki, Gürcüstan-Azərbaycan-Türkiyə biznes forumu çərçivəsində Gürcüstanın iqtisadiyyat və davamlı inkişaf naziri Mariam Kvrivişvili ilə görüş keçirilib. Görüşdə Azərbaycan-Gürcüstan iqtisadi tərəfdaşlığının şaxələndiyi və regional layihələrdə uğurlu əməkdaşlığın davam etdiyi vurğulanıb.

Müzakirələr zamanı işgüzar əlaqələrin gücləndirilməsi, həmçinin ticarət, enerji, nəqliyyat, tranzit və digər sahələrdə birgə fəaliyyətin prioritet istiqamətləri diqqətə çatdırılıb.