“Agalarov Development” şirkətinin prezidenti və “Sea Breeze” kurort şəhərinin təsisçisi Emin Ağalarov layihənin inkişafı, infrastrukturun genişləndirilməsi və investisiya strategiyası barədə danışıb.

AZƏRTAC xəbər verir ki, sahibkar “İnvestisiyaların yeni coğrafiyası” sessiyasında moderator və “Kommersant FM”in aparıcısı Pyotr Kosenkonun suallarını cavablandırıb.

E. Ağalarovun sözlərinə görə, “Sea Breeze”də regionun iqliminə uyğunlaşdırılmış bitkilərdən istifadə edilərək genişmiqyaslı abadlıq işləri davam edir. Artıq 11 milyon ədəd ağac və digər bitkilər əkilib.

“Biz İspaniyadan bitkilər — palma ağacları, aqava, rozmarin və digər növlər idxal edirik. Onları iqlimə, küləyə və duzlu mühitə davamlı şəkildə seçmək üçün 20 il sərf etdik. İndi onlar gözəl şəkildə kök salırlar”, - deyə o bildirib. “Sea Breeze”in təsisçisi vurğulayıb ki, layihənin inkişafı yollar, elektrik təchizatı və su ehtiyatları da daxil olmaqla müasir infrastrukturun yaradılması sayəsində mümkün olub.

“Əvvəllər su çatışmazlığı var idi və bu da bahalı həllərin istifadəsini zəruri edirdi. İndi mərkəzi su təchizatı şəbəkəsi qoşulub ki, bu da ərazinin abadlaşdırılması və inkişafının əhəmiyyətli dərəcədə genişləndirilməsinə imkan verib”, - deyə E. Ağalarov qeyd edib.

O qeyd edib ki, su təchizatı sisteminin dayanıqlığına və yaşıl sahələrin qorunması üçün ehtiyat potensialının yaradılmasına xüsusi diqqət yetirilir.

E. Ağalarov, həmçinin layihənin investisiya modelinin yeni nəsil investorlara yönəldiyini və inkişafa çevik maliyyə alətləri və maksimum gəlir zəmanətləri ilə dəstək verildiyini qeyd edib.

“İyirmi il ərzində qurduğumuz təmələ əminik, investorlara aydın və şəffaf şərtlər təklif edə bilərik”, - deyə “Agalarov Development” şirkətinin prezidenti əlavə edib.