Rusiya tərəfi mayın 15-də İstanbulda baş tutacaq danışıqlara hazırlığını davam etdirir.

Oxu.Az-ın "İnterfaks"a istinadla verdiyi məlumata görə, bu barədə Rusiya prezidentinin mətbuat katibi Dmitri Peskov bəyan edib.

Jurnalistlərlə ünsiyyət zamanı Peskovdan 2022-ci il razılaşmalarının yeni danışıqlar üçün əsas olub-olmayacağı və Kremlin Ukrayna Prezidenti Volodimir Zelenskinin Rusiya Prezidenti Vladimir Putinlə şəxsən görüşmək niyyətinə münasibəti soruşulub.

"Burada 9 May bayramının yekunlarına dair prezidentin gecə bəyanatında deyilənlərə əsaslanmaq lazımdır. Rusiya tərəfi cümə axşamı baş tutmalı olan danışıqlara hazırlaşmağa davam edir. Hələlik başqa heç bir şərh vermək niyyətində deyilik", - deyə Kremlin nümayəndəsi bildirib.

Peskovun sözlərinə görə, Rusiya nümayəndə heyətinin tərkibi prezident tərəfindən zəruri hesab edildiyi zaman açıqlanacaq.

Xatırladaq ki, mayın 11-nə keçən gecə Putin mayın 15-də Ukrayna ilə birbaşa danışıqların İstanbulda bərpası təşəbbüsü ilə çıxış edib.

Türkiyə Prezidenti Rəcəb Tayyib Ərdoğan isə Rusiya və Ukrayna nümayəndə heyətlərini İstanbula qəbul etməyə hazır olduğunu bəyan edib.