BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində mayın 18-də Qazaxıstanın Baş nazirinin müavini – Hökumət Aparatının rəhbəri Qalımjan Qoyşıbayev, Astana şəhərinin akimi Jenis Kasımbek, Qazaxıstanın Azərbaycandakı səfiri Alim Bayel “Urban Expo” sərgisinin pavilyonları ilə tanış olublar.

AZƏRTAC xəbər verir ki, pavilyonda qonaqlara sərgi barədə ətraflı məlumat verilib.

Xatırladaq ki, 3,5 hektar ərazini əhatə edən “Urban Expo” sərgisi 66 ölkədən 217-dən çox təşkilatı bir araya gətirir. Sərgi hökumətlər, vətəndaş cəmiyyəti institutları, akademik dairələr, beynəlxalq qurumlar və özəl sektor nümayəndələrinin WUF13-ün “Hər kəs üçün yaşayış yerləri: təhlükəsiz və dayanıqlı şəhərlər və yaşayış məskənləri” mövzusu ətrafında fikir mübadiləsi aparması, təşəbbüslər irəli sürməsi və tərəfdaşlıq əlaqələri qurması üçün dinamik platforma rolunu oynayır.

Eyni zamanda, yeni yaradılmış “Biznes və innovasiyalar mərkəzi” platformasında təmsil olunan 45 şirkət və 14 startap layihəsi də sərgidə iştirak edir.