Kanal 20 TV xəbər verir ki, Nəsimi rayonunda fəaliyyətə başlayan “Lady Bug Stars” məktəbəqədər təhsil müəssisəsinin açılış mərasimi yüksək əhval-ruhiyyə və maraqlı anlarla yadda qaldı.

Tədbirdə ictimaiyyət nümayəndələri, valideynlər, təhsil sahəsinin təmsilçiləri və qonaqlar iştirak etdilər.

Açılış mərasimində çıxış edən Əməkdar jurnalist, Nurlu Sabah Gənclərə Qayğı İctimai Birliyinin həmtəsisçisi Elnarə Dərziyeva bildirib ki, uşaqların sağlam, yaradıcı və sevgi dolu mühitdə böyüməsi cəmiyyətin gələcəyi üçün ən vacib məsələlərdən biridir.

O həmçinin qeyd edib ki, belə təhsil ocaqlarının yaradılması uşaqların həm bilik, həm də mənəvi inkişafına böyük töhfə verir:

“Uşaqlar bizim gələcəyimizdir. Onların sevgi, qayğı və keyfiyyətli təhsil mühitində böyüməsi gələcək cəmiyyətimizin formalaşması deməkdir.

“Lady Bug Stars” kimi müasir və isti mühitə sahib baxçaların açılması sevindirici haldır”.

Tədbirdə çıxış edən baxçanın direktoru Xatirə Əsgərova isə bildirib ki, müəssisənin əsas məqsədi uşaqların təhlükəsiz, rahat və inkişafyönümlü mühitdə təhsil almalarını təmin etməkdir. Onun sözlərinə görə, burada uşaqların yaradıcılıq qabiliyyətinin inkişafı, xarici dil bacarıqları və sosial aktivliyi xüsusi diqqət mərkəzində olacaq.

Açılış mərasimində uşaqların iştirakı ilə maraqlı musiqili proqram nümayiş olunub, rəngarəng dekorasiyalar və əyləncəli çıxışlar qonaqlarda xoş təəssürat yaradıb. Valideynlər yeni fəaliyyətə başlayan baxçada yaradılan şəraitdən məmnunluqlarını ifadə ediblər.

Müasir tədris avadanlıqları, təhlükəsizlik sistemi və uşaqların rahatlığı üçün qurulan xüsusi otaqları ilə seçilən “Lady Bug Stars” baxçasının Nəsimi rayonunda məktəbəqədər təhsil sahəsinə yeni nəfəs gətirəcəyi bildirilir.