Rusiya Dövlət Dumasının deputatı Sergey Mironov ölkədə miqrant qadınların pulsuz doğuş imkanlarının məhdudlaşdırılması təşəbbüsünü irəli sürüb və bunun səhiyyə sisteminin və büdcənin yükünü azaltmaq üçün zəruri olduğunu iddia edib.

Oxu.Az xəbər verir ki, bu barədə deputat ura.ru-ya müsahibəsində danışıb.

O vurğulayıb ki, icbari tibbi sığorta (İTS) çərçivəsində pulsuz tibbi xidmət hüququ yalnız Rusiya vətəndaşları üçündür.

"İcbari tibbi sığorta formasında pulsuz tibbi xidmət yalnız Rusiya vətəndaşlarına aiddir. Əcnəbilərə gəlincə, onlar Rusiyada rəsmi olaraq işlədikləri və işəgötürənləri onlara ən azı üç il sığorta haqqı ödədikləri halda İTS polisi almaq hüququna malikdirlər. Qalan hər kəs ödəniş etməlidir", - deyə Mironov bildirib.

Siyasətçi ölkəyə giriş edənlər üçün məcburi tələbin tətbiq olunmasını təklif edib: könüllü tibbi sığorta polisinin olması. Onun fikrincə, sənədi ya miqrantın özü, ya da qəbul edən tərəf təqdim edə bilər, lakin o, sərhəd-keçid mərhələsində təqdim edilməlidir.