Azərbaycan Prezidenti İlham Əliyevin sədrliyi ilə fevralın 11-də “Azərbaycanın yeni rəqəmsal arxitekturası” adlı vahid fəaliyyət planına həsr olunmuş müşavirə keçirilib.

Kanal 20 TV xəbər verir ki, müşavirədə ölkədə rəqəmsal transformasiya proseslərinin sürətləndirilməsi, dövlət idarəçiliyində müasir texnologiyaların tətbiqi və rəqəmsal infrastrukturun inkişafı ilə bağlı məsələlər müzakirə olunub.

Görüş zamanı Azərbaycanın rəqəmsal gələcəyinin formalaşdırılması istiqamətində prioritetlər, vahid fəaliyyət planının əsas məqsədləri və həyata keçiriləcək tədbirlər diqqətə çatdırılıb.

Prezident İlham Əliyev rəqəmsallaşmanın dövlət xidmətlərinin keyfiyyətinin artırılması, şəffaflığın təmin olunması və vətəndaşlara daha çevik xidmət göstərilməsi baxımından mühüm əhəmiyyət daşıdığını vurğulayıb.

Müşavirədə həmçinin yeni rəqəmsal arxitektura çərçivəsində dövlət qurumları arasında koordinasiyanın gücləndirilməsi və innovativ həllərin tətbiqi ilə bağlı tapşırıqlar verilib.

Qeyd edək ki, bu barədə məlumatı Prezidentin Mətbuat Xidməti yayıb.