ABŞ prezidenti Donald Trampın təşəbbüsü ilə hazırlanmış “Sülh və Firavanlığın Qorunması haqqında Bəyanat” Ağ Evin rəsmi saytında dərc olunub.

Musavat.com xəbər verir ki, sənəddə Yaxın Şərqdə başa çatan müharibədən sonra bölgədə yeni, ümid və sabitlik dolu dövrün başlandığı vurğulanır.

Tarixi sülh və yeni mərhələ

Bəyanatda bildirilir ki, “Tramp Sülh Sazişi” sayəsində iki ildən artıq davam edən iztirab və itkilər aradan qalxıb və fələstinlilər ilə israillilər bərabər rifah və təhlükəsizlik şəraitində yaşamaq imkanı əldə ediblər.

Əməkdaşlıq və dialoq yolu

Tərəflər sülhün yalnız qarşılıqlı əməkdaşlıq və daimi dialoq vasitəsilə möhkəmlənəcəyinə inanır və xalqlar arasında əlaqələrin güclənməsinin regional və qlobal sabitlik üçün mühüm rol oynadığını bildirirlər. Həmçinin bölgənin xristianlıq, islam və iudaizm üçün müqəddəs əhəmiyyət daşıdığı vurğulanır.

Radikalizmə qarşı birgə mübarizə

Bəyanatda ekstremizm və radikallaşmanın bütün formalarına qarşı mübarizə aparmağın vacibliyi qeyd olunur: “Heç bir cəmiyyət zorakılıq və irqçilik normaya çevrildiyi halda inkişaf edə bilməz. Təhsil, imkanların genişlənməsi və qarşılıqlı hörmət sülhün dayaqlarıdır”.

Mübahisələr diplomatik yolla həll olunacaq

Liderlər gələcəkdə bütün mübahisələrin yalnız diplomatik danışıqlar və qarşılıqlı anlaşma yolu ilə həll ediləcəyini təsdiqləyiblər.

“Yaxın Şərq sonsuz müharibələr dövrünü arxada qoymalıdır. Gələcək nəsillər sabahın ümidlərinə layiqdir”. 

İnsan ləyaqəti və bərabərlik

Sənəddə qeyd olunur ki, regionda hər bir insan — irqindən, dinindən və ya etnik mənsubiyyətindən asılı olmayaraq — sülh, təhlükəsizlik və iqtisadi rifah içində yaşamaq hüququna malikdir.

Bəyanatı imzalayan liderlər:

Donald J. Tramp – ABŞ prezidenti

Əbdülfəttah əs-Sisi – Misir prezidenti

Təmim bin Həmad Al Tani – Qətər əmiri

Rəcəb Tayyib Ərdoğan – Türkiyə prezidenti

Liderlər bəyanatın sonunda bir daha vurğulayıblar: “Biz bölgəmizdə qalıcı sülh və ümumi firavanlıq üçün birgə işləməyə sadiqik”.