Şimali İrlandiyanın Belfast şəhərindəki “Queen’s” Universitetinin (QUB) alimləri tərəfindən aparılan son tədqiqat Böyük Britaniya boyunca torf ərazilərində qurğuşun, arsen, civə və kadmium kimi zəhərli ağır metalların yığıldığını üzə çıxarıb.

AZƏRTAC BBC-yə istinadla xəbər verir ki, alimlər iqlim dəyişikliyi və meşə yanğınlarından sonra bu maddələrin torpaq aşınması nəticəsində su hövzələrinə qarışa biləcəyi, həm ətraf mühit, həm də insan sağlamlığı üçün təhlükə yarada biləcəyi ilə bağlı xəbərdarlıq ediblər.

“Bir çox hallarda təmiz və əl dəyməmiş hesab etdiyimiz torf sahələrində bu qədər yüksək səviyyədə çirklənmə tapmaq heyrətamizdir. Amma məlum olur ki, bu ərazilər də sənaye çirkliliyindən ciddi şəkildə təsirlənib”, - Britaniya və İrlandiyadan götürülən torf nümunələrini təhlil edən tədqiqatçılar bildiriblər.

Torf sahələri iqlim dəyişikliyi ilə mübarizədə mühüm rol oynayan karbontutucu ekosistemlərdir. Onlar eyni zamanda son iki əsrdə sənaye fəaliyyəti nəticəsində yaranmış çirklənməni də özündə saxlayıb. Mütəxəssislər bildirir ki, torf sahələrinin yenidən su ilə bərpası və qorunması təkcə iqlimə görə yox, həm də ictimai sağlamlıq naminə daha da həyati əhəmiyyət daşıyır.