Azərbaycanın xarici işlər naziri Ceyhun Bayramov ilə Qazaxıstanın xarici işlər naziri Yermek Koşerbayev arasında telefon danışığı keçirilib.

Kanal 20 TV xəbər verir ki, bu barədə Azərbaycanın Xarici İşlər Nazirliyi məlumat yayıb.

Telefon danışığı zamanı regionda müşahidə olunan hərbi eskalasiya və artan gərginlik ətrafında fikir mübadiləsi aparılıb. Nazirlər son hadisələrlə bağlı ciddi narahatlıqlarını ifadə edərək, vəziyyətin daha da kəskinləşməsinin regional təhlükəsizlik və sabitlik üçün əhəmiyyətli risklər yaratdığını vurğulayıblar.

Görüş zamanı tərəflər iki ölkənin bölgədə fəaliyyət göstərən diplomatik nümayəndəliklərinin konsulluq şöbələri arasında əməkdaşlığın gücləndirilməsinin vacibliyini qeyd edib, vətəndaşlara göstərilən dəstəyin daha koordinasiyalı şəkildə təşkilinin faydalı olacağını bildiriblər.

Telefon danışığında həmçinin qarşılıqlı maraq doğuran digər regional və beynəlxalq məsələlər də müzakirə olunub.