İşğaldan azad edilmiş ərazilərdə radio-televiziya infrastrukturunun bərpası istiqamətində işlər davam etdirilir.

Azərbaycan Respublikasının Prezidenti İlham Əliyevin müvafiq Sərəncamı ilə təsdiq edilmiş “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” na əsasən, AZCON Holding şirkətlərindən olan “Radio-Televiziya Yayımı və Peyk Kommunikasiyası” MMC tərəfindən ardıcıl tədbirlər həyata keçirilir.

APA xəbər verir ki, 29 dekabr 2025-ci il tarixində Ağdərə rayonu ərazisində yerləşən Talış, Kiçik Qarabəy və Həsənriz Radio-Televiziya Yayım Stansiyalarının fəaliyyəti bərpa olunub.

Bununla da işğaldan azad edilmiş ərazilərdə indiyədək bərpa edilən radio-televiziya yayım stansiyalarının sayı 11-ə çatdırılıb. Görülən işlər nəticəsində rəqəmsal televiziya və FM radio yayımlarının əhatə dairəsi genişləndirilib, siqnal keyfiyyəti isə əhəmiyyətli dərəcədə yaxşılaşdırılıb.

Qeyd edək ki, 2026-cı il üzrə əhalinin köç qrafiki diqqətdə saxlanılacaq və radio-televiziya proqramlarının tələb olunan ərazilərdə fasiləsiz yayımının təmin edilməsi istiqamətində müvafiq tədbirlərin görülməsi nəzərdə tutulur.