Kanal 20 TV tarixçi-alim Erhan Afyoncunun rəsmi X səhifəsində paylaşdığı məlumata istinadən xəbər verir ki, Avropanın siyasi tarixində dönüş nöqtəsi hesab olunan Qanuni Sultan Süleymanın Fransa kralına göndərdiyi məşhur fərmanın 500 ili tamam olur.

1525-ci ildə İspaniya kralı və Müqəddəs Roma imperatoru V Karl (Şarlken) Fransa kralı I Fransuanı Paviya döyüşündə məğlub edərək əsir alıb. Bu ağır məğlubiyyətdən sonra Fransa Habsburqlar qarşısında aciz vəziyyətə düşərək Osmanlı dövlətindən yardım istəmək məcburiyyətində qalıb.

Fransa kralının yardım müraciətinə cavab olaraq Qanuni Sultan Süleyman 1526-cı ilin yanvarında I Fransuaya tarixi bir fərman göndərib. Bu fərman Avropada mövcud olan güc balansını kökündən dəyişdirən ilk mühüm addım kimi tarixə düşüb. Osmanlı dövlətinin diplomatik və hərbi dəstəyi Habsburq hegemoniyasının zəifləməsinə səbəb olub, Avropanın siyasi xəritəsinin yenidən formalaşmasında həlledici rol oynayıb.

Qanuni Sultan Süleymanın Fransaya göndərdiyi bu fərmanda Osmanlı imperiyasının qüdrəti və əzəməti açıq şəkildə nümayiş etdirilir. Fərmanda sultan öz titul və haşmətini vurğulayaraq imperiyanın vilayətlərini bir-bir sadalayır, Fransa isə adi bir vilayət kimi təqdim olunur. Fransa kralının adına və tituluna xüsusi yer verilməməsi Osmanlı diplomatik üslubunda üstünlüyün açıq göstəricisi kimi qiymətləndirilir.

Avropanın siyasi taleyinə ciddi təsir göstərən və Osmanlı dövlətinin beynəlxalq münasibətlərdəki gücünü əks etdirən bu möhtəşəm tarixi sənəd bu gün 500 illiyini qeyd edir.