İranda internetin kütləvi şəkildə kəsilməsi artıq 130 saatdan çoxdur davam edir.

Kanal 20 TV xarici mediaya istinadən xəbər verir ki, İran hakimiyyəti ölkədə qlobal internetə çıxışın tam sakitlik bərpa olunana qədər bağlı qalacağını rəsmi şəkildə təsdiqləyib.

Rəsmi açıqlamalarda bildirilir ki, internet məhdudiyyətləri ölkədə baş verən etirazlar və təhlükəsizlik narahatlıqları ilə əlaqədardır. Hakimiyyət orqanları vəziyyətin nəzarət altına alındığını iddia etsə də, sosial şəbəkələrə və beynəlxalq internet resurslarına çıxış hələ də mümkün deyil.

Ekspertlər uzunmüddətli internet kəsintisinin ölkə iqtisadiyyatına, media fəaliyyətinə və əhalinin informasiya əldə etmək imkanlarına ciddi zərbə vurduğunu bildirirlər.

Hazırda İranda yalnız məhdud daxili şəbəkələrə çıxışın qismən mümkün olduğu qeyd olunur. Qlobal internetin nə vaxt bərpa ediləcəyi ilə bağlı isə dəqiq tarix açıqlanmayıb.