AZƏRTAC-ın Uşaq Bilik Portalı və Özbəkistanın “Tonq Yulduzi” qəzetinin birgə təşkilatçılığı ilə uşaqlar arasında “Milli adət-ənənələr və bayramlar” mövzusunda beynəlxalq rəsm müsabiqəsinə start verilib.

Kanal 20 TV-nin məlumatına görə, müsabiqənin əsas məqsədi şagirdlərdə vətənpərvərlik hissini gücləndirmək, Azərbaycan və Özbəkistan uşaqları arasında dostluq və qardaşlıq münasibətlərini möhkəmləndirmək, eyni zamanda milli adət-ənənələrin və bayramların təbliğini genişləndirməkdir.

Müsabiqə 8–11 və 12–15 yaş kateqoriyaları üzrə keçirilir. İştirakçılar rəsmlərini A3 formatında təqdim etməli, hər müəllif maksimum 3 yaradıcılıq işi göndərə bilər.

Təqdim olunan rəsmlərlə birlikdə iştirakçının soyadı, adı, atasının adı, şəhər (rayon), məktəb və sinfi, həmçinin fotoşəkli və əlaqə telefonu qeyd olunmalıdır. Yaradıcılıq işləri [email protected] elektron poçt ünvanına göndərilməlidir. Müsabiqəyə rəsmlərin qəbulu 2026-cı il martın 15-dək davam edəcək.

Qeyd edək ki, hər yaş kateqoriyası üzrə 3 nəfər olmaqla, ümumilikdə 6 qalib müəyyənləşdiriləcək. Müsabiqənin nəticələri Novruz bayramı ərəfəsində açıqlanacaq. Qaliblər diplom və hədiyyələrlə təltif olunacaqlar.

Əlavə məlumat üçün “Facebook”da “Uşaq Bilik Portalı”, “Instagram”da isə @usaqbilikportali səhifələrinə müraciət etmək mümkündür.