Cəmiyyətdə uzun illərdir formalaşmış bir yanaşmaya görə, sülh sadəlövh ideya, siyasətdə isə yeganə “real” yol şəxsi maraqlar və güc tətbiqidir. Lakin Birləşmiş Millətlər Təşkilatının qurucuları bu fikirlə razı deyildilər.

Onlar müharibənin dəhşətlərini şəxsən yaşamış, insanlıq tarixinin ən ağır faciələrinin şahidi olmuş şəxslər idi. Məhz bu acı təcrübə onlara göstərmişdi ki, davamlı və ədalətli dünya nizamı yalnız güc üzərində deyil, sülh, ədalət və bərabərlik prinsipləri üzərində qurula bilər.

BMT-nin yaradılmasının əsas fəlsəfəsi də buradan qaynaqlanır. Qurucu liderlər hesab edirdilər ki, sülh təkcə mənəvi seçim deyil, eyni zamanda ən cəsarətli, ən praktik və ən zəruri yoldur. Onların fikrincə, real siyasət məhz münaqişələrin qarşısını alan, xalqlar arasında bərabərliyi və ədaləti təmin edən siyasətdir.

Bu gün də beynəlxalq münasibətlərdə yaşanan gərginliklər fonunda BMT-nin qurucularının bu mesajı aktuallığını qoruyur və sülhün alternativsiz olduğunu bir daha xatırladır.