ABŞ Prezidenti Donald Trampın son açıqlamaları Avropa İttifaqı ilə ABŞ arasında ticarət münasibətlərində gərginliyi daha da artırıb. Kanal 20 TV xəbər verir ki, Avropa Parlamenti ABŞ ilə imzalanmış ticarət sazişinin planlaşdırılan ratifikasiyasını dayandırmaq qərarına gəlib.

“Report”un məlumatına görə, Avropa Parlamentinin aparıcı siyasi qüvvəsi olan Avropa Xalq Partiyasının sədri Manfred Veber bu barədə Almaniyanın “ZDF” telekanalına müsahibəsində açıqlama verib. Onun sözlərinə görə, ötən yay Avropa İttifaqı ilə ABŞ arasında əldə olunmuş razılaşmanın ratifikasiyasının dayandırılması Tramp administrasiyasına açıq mesajdır.

Veber bildirib ki, bu qərarla ABŞ məhsullarının Avropa İttifaqının daxili bazarına rüsumsuz çıxışı mümkün olmayacaq: “Bu, Vaşinqtona ilk ciddi siqnaldır. Donald Tramp dünən gecə çox şey itirdi”.

Qeyd edək ki, 26 yanvarda Avropa Parlamentində Brüssel və Vaşinqton arasında 2025-ci ilin yayında razılaşdırılmış sazişin əsas maddələrindən biri – Amerika sənaye məhsullarına tətbiq olunan tariflərin ləğvi məsələsi üzrə səsvermə keçirilməsi nəzərdə tutulurdu. Lakin “Politico”nun yazdığına görə, Trampın bəyanatlarından narazı qalan bir sıra deputatlar səsvermənin baş tutmasına qarşı çıxıb və proses dondurulub.

Bununla yanaşı, Britaniyanın “Financial Times” qəzeti Avropa rəsmilərinə istinadən xəbər verir ki, Avropa İttifaqı Qrenlandiya məsələsi fonunda ABŞ-yə qarşı 93 milyard avro həcmində mümkün cavab tədbirlərini də nəzərdən keçirir.

Məsələ Avropa–ABŞ münasibətlərində yeni mərhələnin başlandığını göstərir.