Azərbaycan Respublikasının Prezidenti İlham Əliyev fevralın 14-də Münxen şəhərində Bolqarıstan Respublikasının Prezidenti İliyana Yotova ilə görüş keçirib.

Kanal 20 TV xəbər verir ki, görüş zamanı iki ölkə arasında mədəni-humanitar və iqtisadi əməkdaşlıq məsələləri geniş müzakirə olunub.

Bolqarıstan Prezidenti Azərbaycanda keçirilmiş Mədəniyyətlərarası Dialoq Forumunda iştirak etdiyini xatırladaraq, Azərbaycan mədəniyyəti ilə yaxından tanış olduğunu bildirib. O, xüsusilə Novruz bayramı ənənələrinin və muğam musiqisinin onda dərin təəssürat yaratdığını qeyd edib.

İliyana Yotova Heydər Əliyev Fondunun Bolqarıstanda “Trapezitsa” Memarlıq Muzeyi-Qoruğunun bərpasına verdiyi dəstəyi xüsusi vurğulayaraq, buna görə minnətdarlığını ifadə edib. Həmçinin Azərbaycanın ali təhsil müəssisələrində bolqar dilinin tədrisinə və bolqar mədəniyyətinə göstərilən diqqətə görə Prezident İlham Əliyevə təşəkkür edib.

Görüşdə bir neçə gün öncə Azərbaycan və Bolqarıstan hökumətləri, eləcə də Veliko Tırnovo Bələdiyyəsi arasında həmin şəhərdə Şuşa parkının salınması və yenidən qurulması ilə bağlı əməkdaşlıq sazişinin imzalanması məmnunluqla qeyd olunub.

Tərəflər enerji sahəsində əməkdaşlıq, elektrik enerjisinin ixracı, kənd təsərrüfatı, turizm və digər istiqamətlərdə əlaqələrin inkişaf perspektivlərinə də toxunublar. Bolqarıstanın Azərbaycan–Avropa İttifaqı münasibətlərinin inkişafına verdiyi dəstək yüksək qiymətləndirilib.

Sonda bu ilin may ayında Azərbaycanın ev sahibliyi edəcəyi Dünya Şəhərsalma Forumunda Bolqarıstanın yüksək səviyyədə təmsil olunacağı bildirilib.