Ukrayna Ali Radasında qalmaqallı korrupsiya araşdırması başlayıb. Hakim “Xalqın Xidmətçisi” partiyasından olan bir neçə deputatın səsvermə müqabilində rüşvət aldığı iddiası ölkədə böyük səs-küyə səbəb olub.

Musavat.com xəbər verir ki, ZN.UA və “Ukrainskaya Pravda” nəşrlərinin hüquq-mühafizə orqanlarındakı mənbələrə istinadən yaydığı məlumata görə, Ukrayna Milli Antikorrupsiya Bürosu (NABU) tərəfindən 4 deputatla bağlı cinayət işi açılıb.

İstintaqa cəlb edilən şəxslər arasında deputatlar Yevgeni Pivovarov, İqor Nequlevski və Yuri Kiselynin adları çəkilir.

“Ukrainskaya Pravda” əlavə edir ki, Olya Savçenko da rəsmi şəkildə şübhəli şəxs qismində xəbərdarlıq alıb.

Məlumata görə, NABU Yuri Kiselyin ofisini dinləyib və əldə olunan materiallarda deputatların pul dolu zərflər aldığı iddia olunur.

Eyni zamanda, ZN.UA yazır ki, “Kvartal 95” komandasının üzvü, “Yuzik” ləqəbi ilə tanınan Yuri Koryavçenkoya hələlik rəsmi şübhə bildirişi təqdim edilməyib. NABU onun evində axtarış aparılması barədə yayılan məlumatları təkzib etsə də, mənbələr Koryavçenkonun ölkəni tərk etdiyini bildirir.

Qalmaqallı araşdırma Ukrayna parlamentində korrupsiya ilə bağlı vəziyyəti bir daha gündəmə gətirib və istintaqın genişlənəcəyi istisna edilmir.