Dövlət Sərhəd Xidmətinin (DSX) Mərkəzi Aparatına rəhbərlik etmiş general-leytenant Babək Qurbanov xidmətdən ayrılaraq təqaüdə göndərilib.

Kanal 20 TV xəbər verir ki, bu barədə məlumatı Qafqazinfo yayıb. Bildirilir ki, 43 yaşlı general öz arzusu ilə hərbi xidməti başa vurub.

Babək Qurbanov İkinci Qarabağ müharibəsində xüsusi şücaət göstərən zabitlər sırasında yer alıb. Müharibədən sonra o, müxtəlif orden və medallarla təltif olunub, eyni zamanda “Vətən Müharibəsi Qəhrəmanı” fəxri adına layiq görülüb.

Qeyd edək ki, generalın əkiz qardaşı Bayram Qurbanov da hərbçidir və hazırda Xüsusi Təyinatlı Qüvvələrdə polkovnik rütbəsində xidmətini davam etdirir.

Xatırladaq ki, Babək Qurbanov yaxın günlərdə DSX Mərkəzi Aparatının rəhbəri vəzifəsindən azad edilmişdi. Artıq həmin posta general-mayor Faiq Məmmədov təyin olunub.