Kanal 20 TV xəbər verir ki, Azərbaycan 12–22 fevral tarixlərində Almaniyanın paytaxtı Berlin şəhərində keçirilən 76-cı Berlin Beynəlxalq Film Festivalında (Berlinale) iştirak edir.

Festival çərçivəsində ölkəmizi təmsil edən nümayəndə heyəti milli kinematoqrafiyanın beynəlxalq səviyyədə tanıdılması və yeni əməkdaşlıq imkanlarının yaradılması məqsədilə bir sıra işgüzar görüşlər keçirir.

Səfər zamanı Berlində yerləşən Azərbaycan Mədəniyyət Mərkəzində Azərbaycan Respublikasının Kino Agentliyi (ARKA) ilə Gürcüstan Milli Kino Mərkəzi arasında əməkdaşlıq memorandumu imzalanıb.

Memorandumun əsas məqsədi audiovizual sahədə birgə film istehsalı mexanizmlərinin inkişaf etdirilməsi, film istehsalçılarına qarşılıqlı xidmətlərin göstərilməsi, iki ölkənin mədəni dəyərlərini əks etdirən layihələrin artırılması və Azərbaycan-Gürcüstan dostluq əlaqələrinin kinematoqrafiyada təşviq olunmasıdır.

Sənədi ARKA-nın baş direktoru Rəşad Əzizov və Gürcüstan Milli Kino Mərkəzinin baş direktoru Mamuka Bliadze imzalayıblar. Memorandum çərçivəsində gələcəkdə tərəflər arasında əlavə müqavilələrin bağlanması da nəzərdə tutulur.