Kanal 20 TV xəbər verir ki, Bakıdan Laçın şəhərinə yeni müntəzəm avtobus marşrutu təşkil olunur.

Azərbaycan Yerüstü Nəqliyyat Agentliyinin (AYNA) yaydığı məlumata görə, yeni Bakı–Laçın reysi fevralın 25-dən fəaliyyətə başlayacaq. Avtobuslar Laçın–Həkəri–Zəngilan yolu ilə hərəkət edəcək.

Reyslər hər gün həyata keçiriləcək. Bakı Beynəlxalq Avtovağzal Kompleksindən avtobuslar saat 08:00-da, Laçından isə Bakı istiqamətinə saat 16:00-da yola düşəcək.

Marşrut üzrə gedişhaqqı 16,10 AZN müəyyən edilib. Aralıq dayanacaq kimi Zəngilan rayonunun Ağalı kəndi seçilib və həmin məntəqəyə gediş haqqı 13,80 AZN təşkil edir.

Qeyd olunur ki, hazırda sərnişinlər Laçına Bakı–Xankəndi–Laçın marşrutu ilə səfər edirlər. Yeni reys istifadəyə verildikdən sonra həmin xətt Bakı–Şuşa reysi kimi fəaliyyət göstərəcək və son dayanacaq Şuşa şəhəri olacaq.

Biletlər yalnız onlayn şəkildə “biletim.az” portalı vasitəsilə əldə edilə bilər. Portal və mobil tətbiq üzərindən bilet alan vətəndaşlara işğaldan azad olunmuş ərazilərə giriş icazəsi avtomatik təqdim olunur.