Azərbaycanın Xalq şairi, tanınmış ədəbiyyat və mədəniyyət xadimi Nəriman Həsənzadə dövlətin ali mükafatlarından biri olan “Heydər Əliyev” ordeni ilə təltif edilib.

Kanal 20 TV xəbər verir ki, Prezident İlham Əliyev bununla bağlı müvafiq Sərəncam imzalayıb.

Sərəncamda qeyd olunub ki, Nəriman Həsənzadə bu yüksək mükafata Azərbaycan mədəniyyətinin və ədəbiyyatının inkişafında göstərdiyi müstəsna xidmətlərə görə layiq görülüb.

Xalq şairi uzun illər ərzində zəngin yaradıcılığı ilə Azərbaycan poeziyasına mühüm töhfələr verib, milli-mənəvi dəyərlərin təbliği istiqamətində xüsusi rol oynayıb. Onun əsərləri geniş oxucu auditoriyası tərəfindən sevilir və ölkənin ədəbi irsində önəmli yer tutur.

Qeyd edək ki, “Heydər Əliyev” ordeni Azərbaycan Respublikasının ən yüksək dövlət təltiflərindən biri hesab olunur və ölkənin ictimai-siyasi, mədəni və elmi həyatında xüsusi xidmətləri olan şəxslərə təqdim edilir.