Çikunqunya qızdırması ağcaqanad dişləməsindən bir neçə gün sonra yüksək hərarət, kəskin oynaq ağrıları və dəri səpgiləri ilə özünü büruzə verə bilər.

Kanal 20 TV xəbər verir ki, Manset.az-ın Baku.ws-ə istinadən yaydığı məlumata görə, infeksionist həkim, tibb elmləri doktoru Vladimir Neronov xəstəliyin yalnız yoluxmuş “pələng ağcaqanadları” vasitəsilə yayıldığını bildirib.

Mütəxəssisin sözlərinə görə, virus insandan insana birbaşa keçmir və əsas yoluxma mənbəyi ağcaqanad dişləməsidir.

Profilaktik tədbirlər vacibdir

Həkim endemik bölgələrdə yaşayan və ya həmin ərazilərə səfər edən şəxslərə qoruyucu tədbirlər görməyi tövsiyə edib. Bunlara aşağıdakılar daxildir:

repelentlərdən istifadə

bədəni örtən geyimlər geyinmək

ağcaqanad toru olan məkanlarda qalmaq

durğun su qablarını aradan qaldırmaq

Qeyd olunur ki, bu növ ağcaqanadlar əsasən gündüz saatlarında daha aktiv olur.

Müalicə yoxdur, amma ölüm halları nadirdir

Neronov bildirib ki, xəstəliyin spesifik müalicə üsulu mövcud olmasa da, vaxtında tibbi yardım göstərilməzsə, xüsusilə yaşlı insanlarda xroniki oynaq ağrılarına və əlavə fəsadlara səbəb ola bilər. Ölüm halları isə nadir hesab olunur.

Risk qrupunda kimlər var?

Risk qrupuna əsasən:

tropik ölkələrdən qayıdan turistlər

cənub bölgələrində yaşayan şəxslər

daxildir. Xəstəliyi keçirən insanlarda isə ömürlük immunitet formalaşır.

Qapalı məkanlarda mikroiqlim də önəmlidir

Terapevt Olqa Suxareva isə virus infeksiyalarının qarşısının alınmasında otaqlarda rütubət səviyyəsinin roluna diqqət çəkib. Onun sözlərinə görə, rütubətin 40–65% arasında saxlanılması selikli qişaların qurumasının qarşısını alır və yoluxma riskini azaldır.

Otaqların mütəmadi havalandırılması da virus yükünü azaltmaq baxımından xüsusilə vacib sayılır.